بيتنــــا بيطيـــح ...

هذى قصه
لكن لقيت ان النقاش حولها اهم من اننا نقراها و نقول مشكووور و يسلمووو

واقع بحياتنا اغلبنا يعانى منه اتمنى فتح باب النقاش حوله

العيال مجتمعين مثل العاده ... تقريباً مثل اجتماعاتهم كل يوم
جلسات بالساعات والنتيجه لم ينجح أحد
يذكروني باجتماعات بعض الناس
بس الفرق ان اجتماع العيال يصير بدون (( زخم )) اعلامي
والفرق بعد ان العيال يجون للاستراحه على سياراتهم
بينما بعض الناس يجون للاستراحه على طياراتهم @@

شغل بلوتوثك ....
سعود يقول / عندك شي جديد ؟
_ ايه .. عندي لك ملفات من النوع الي تصلح لك
_ ارسل طيب

جار البحث عن اجهزه IZZZZZZZI
بيتنا بيطيح

_ انت (( بيتنا بيطيح )) ؟
_ ايه هذا اسمي ... كان هذا رد سعود
عاد زميله يسأله / الحين مالقيت الا هالاسم ؟
_ لأنه فعلاً يتكلم عن واقع بيتنا
_ بس بيتكم عاد دخلناه كثير .. كان ذاك البيت بيطيح اجل وش نقول عن بيوتنا ؟
رد عليه سعود / بيطيح بس موب مثل بيوت الناس
_ اجل شلون بيتكم بيطيح ؟
يعني يطيح الدور التحتي ويبقى الفوقي والا كيف ؟

تربع سعود والظاهر انه اخيراً حصل احد يفضفض له ...
خصوصاً ان هذا صديق خاص ويعرفه من ايام الطفوله
واكيد مابينهم اسرار

قال / سالفة بيتنا سالفه غريبه .. ومصطلح بيطيح معناه ان البيت لك عليه
و يعني ان كل جزء منه بعيد عن الثاني !
_ شلون ؟؟
مافهمت !!

_ قبل كم يوم وصل ابوي من السفر
كان وقت وصوله آخر الليل
وقتها كنت انا جالس بالملحق لحالي
دخل للملحق وقمت اسلم عليه واتحمد له بالسلامه
كان سلامي عليه ببرود
هو تعود على اني اقابله ببرود
وانا تعودت على اني كل يوم اشوفه داخل البيت بشنطته
ابوي يسافر شهر ويجلس ببيتنا يوم
لذلك صايرين مانفقده
ومانحس بوجوده اذا هو موجود بالبيت !
سألني ليه انا جالس هالوقت بالملحق ؟
قلت له / انتظر المطعم طالب لي عشا
قال لي / ليه ماتعشيت بدري مع اهلك مثل الناس ؟
قلت له / توي راجع من الاستراحه ...
نايف ماحصلته بالبيت شكله مع اخوياه
وامي طالعه مع خالتي منيره مثل العاده
و انت ....
قاطعني ابوي وقال / خلاص
انت اسطوانتك هي نفسها ماتتغير
اختك وينها ؟
قلت له / اختي الظاهر نايمه
من رجعت للبيت ماشفتها
قال / طيب اذا جت امك علمها اني وصلت
اخاف اروح انام في البيت الثاني
قلت له / اجل ليه جاي هالوقت وانت مارح تنام عندنا ؟
قال / ياكثر اسئلتك الي على غير سنع
جاي آخذ اوراق من المكتب ابيها الصباح بدري
المهم لا تنسى ..
وقطعت حوارنا امي داخله من الباب
طالعت ابوي من تحت لفوق وقالت من غير نفس
الحمد لله على سلامتك
ماكنك طولت هالمره ؟
قال ابوي / الله يسلمك
وبعدين حتى لو طولت موب علشانك انتي وعيالك
انتي عارفه اني رايح لشغل
قالت امي / ورجال الأعمال التاليين كل من راح لشغل لازم ياخذ زوجته الجديده معه ؟
قال ابوي / ماتلاحظين ان اسألتك كنها اسألت ولدك مالها داعي
المهم وين كنتي لحد الحين ؟
طالعته امي بنفس النظره الي طالعته فيها اول مادخلت
وعطتنا ظهرها ومشت بدون ماترد عليه
وقتها دخل ابوي للمكتب وآخذ الي يبي ورجع يطلع

دخلت على امي وجلست اسولف وياها
_ وبعدين يمّه .. الى متى وحواركم انتي وابوي جاف ؟
_ اسأله هو .. الحين صاحبة السعاده مقابله وجهه لمدة شهر وقت ماكانوا مسافرين
وتشوفه راح ينام عندها
_ بس يمّه الأخطاء موجوده من كل الأطراف
يعني حتى قبل يتزوج ابوي كانت مشاويرك وروحاتك كثيره انتي وخالتي منيره بالذات
وفي كثير من المرّات حتى الأذن من ابوي ماتاخذينه كأنه ماهو رجال
وش تنتظرين بعد كل هذا ؟
_ اقول الظاهر انك بتكون نسخه من ابوك
تفكيركم واحد والنتيجه وحده وهي ان انا الغلطانه الوحيده
_ انا قلت لك يمّه الأخطاء من كل الأطراف .. وبعدين .....
_ خلاص .. اطلع خلني انام
انت وابوك واخوانكم كلكم ماوراكم الا المشاكل

طردتني من الغرفه وقفلت الباب بوجهي
نزلت على صوت الجرس على بالي المطعم جاب العشا
فتحت الباب الا هو اخوي نايف وبصراحه وضعه كان مدري وش يبي
سألته وقلت / يعني مثل العاده ؟
انت متى بتعقل عن هالخرابيط ؟
رد علي / انت وش عرفك بعلوم المرجله ؟
خلك في اخوياك وفي نفسك واترك الرجاجيل في حالهم
قلت بيني وبين نفسي ...
هذا وهو الصغير معاملته واسلوبه كذا
اجل كيف لو كان الكبير ؟
دخل البيت وطلع لغرفته وكأني ماكلمته اصلاً !!

وقتها بس جلست اتخيل وضع بيتنا
امي برا البيت كل الوقت
اخوي ضايع بمسمى (( المرجله ))
اختي ان ماكانت عند صاحباتها فهي في غرفتها
اتوقع لو اشوفها ماعرفتها لأني من زمان ماشفتها !!
وابوي حدّث ولا حرج
يا مسافر
او مسافر
فيه فرق بين السفرتين
وحده بعيده
والثانيه قريبه
ولكنها بعد تعتبر سفر لأننا وقتها مانشوفه !

القصد ان كل واحد في حاله
سواء في اكله وشربه
او في طلعاته ودخلاته للبيت
او في صداقاته وعلاقاته
او حتى في اصغر الأمور
لدرجة ان حتى في الأعياد السلام بيننا غير وارد
الا كان قدام الناس من باب المجامله
وبعد كل هذا ماتبي بيتنا يطيح ؟؟

الا بيتنا آيل للسقوط وبشكل يخوف

التفت سعود على خويه وحصله يفكر في كلامه
وقال له / اترك عنك بيتنا ومشاكله
لأني لو اسولف لك للصبح مارح تنتهي مشاكل بيتنا
المهم ...
عندي لك ملفات بلوتوث جيده بعد
تتذكر فلان لما كان يفحط في الشارع الفلاني ؟
_ ايه .. يقولون صار له حادث غير طبيعي
_ عندي صور الحادث
_ طيب ارسل لي الملف تكفى

سعود يضغط على جواله ...
جار البحث عن أجهزه IZZZZZZZZI

حتى بيتنا بعد بيطيح

سعود يلتفت على خويه مستغرب !
حتى انت يافلان ؟

خويه يطالعه ويبتسم

ِِِاختي عسل

يسلموووووووو علي الطرح الرائع

والله في غاية الروعة والجمال

ننتظر الابداع الجديد

تقبلي مروري

ااااامير